POEM TIME: Kalapati sa Kasalan =)

Paano nga kaya ang buhay ng kalapati tuwing sasapit ang araw na pinaka-aasam asam ko... ANG KASALAN! =)

Kalapati sa Kasalan
Ni Angel Meg

Nakangiti ang lahat sa kasalan
Maliban sa dalawang puting kalapati.

Di pansin ng mga bisita ang kanilang
Di pagkurap o pagpiglas man lang
Habang nasa loob ng magarang kulungan.

Nag-iisip ng malalim, marahil
Kung paano nila ipapagaspas
Ang pakpak ng kanilang kinabukasan.
Kung paano ang buhay sa labas ng rehas
Na di nila kailanman kinasanayan.
Kung paano lumalagpas
At nagtatapos ang ganitong ritwal.

Inilabas na sila sa hawla,
Ipinagpahinga sa mga palad,
Ihinalik sa huling pagkakataon,
At saka pinalaya sa espasyo ng mundo.

Magkaibang direksiyon ang kanilang niliparan...
Pagpalain nawa silang magsama magpakailanman.

Sana po ay magustuhan ninyo. Mabuhay tayong lahat! =)