POEM TIME: Traje de Boda =)

Mabuhay! =)

Tayo nga bang nasa mundo ng "Dakilang Kasalan" ang pinaka-romantiko sa
mundo? Hindi nga ba't umiikot ang ating mga mundo sa ngalan ng
Pag-ibig? Ahhh! May panahon pa nga ba tayo para itula ang Pag-ibig na
ito?

TRAJE DE BODA
Ni Angel MEG

Ako ang Traje de boda.
Ikaw naman ang ikakasal.
Buong luwang kitang inangkin at niyakap
Sa araw ng iyong pagdalaw sa mailaw na altar.
Iyon ang unang pagkakataon.

Natatakot kasi ang pamilya mo sa pagbisita ng malas.
Kaya kahit may kabog sa iyong dibdib,
Tila may di maintindihang pakiramdam nang
Ako ay una mong pinagkatiwalaan
Sa paghatid ko sa iyo sa gitna ng simbahan,
Sa gitna ng mga mata ng mga kakilala,
Sa gitna ng mga matang mapanuri,
Sa gitna ng mata ng Diyos.

Hinayaan kitang magningning,
Magliwanag katulad ng mga chandelier
At stained glass sa paligid.
Kahit alam kong may ibang aangkin sa iyo
Pagkatapos ng ritwal na ito,
Hindi kita iniwanan para lang mapahiya,
Nanatili akong perpekto,
Nagasgas man ang ilalim sa putik at yapak,
Namantsahan man ng keyk at alak,
Naluhaan man ng iyong sariling luha,
O napunit sa inyong unang gabi.

At iyon na rin marahil ang huling pagkakataon.
Alam kong pagkatapos ng araw na iyon,
Hindi mo na ako muling kakamustahin.
Ang iyong paghubad sa akin ay tanda lang
Ng iyong paghakbang sa buhay, katulad ng
Paghakbang natin papuntang dambana.
Lilipasan ako ng gabi at umaga, mangungupas,
At pakikiramayan ng ipis at agiw.
At kung sakaling mapansin mo ulit ako,
Alam kong dito lang ang magiging katapusan:
Sa isang bulok na arkilahan,
Sa bagong magpapakasal,
Sa isang basurahan.

- Angel MEG =)



A Wedding Poet este Planner in Laguna,

Angel MEG =)
09163763718
http://angelmeg9.blogspot.com